是陳腔濫調了，不過還是忍不住想說：
1. 「香港人」幾時先認自己係香港人? 就係有錢派果時!
2. 「香港人」有幾多個唔係新移民?問下你阿爸阿媽係邊度嚟!
3. 點先為之「新移民」? 嚟左七年仲新? 咁七年零一天就唔新啦?
4. 「新移民」曾經為香港帶嚟經濟繁榮, 而家有困境就話人阻住晒, 都係問多次你阿爸阿媽邊度嚟啦!
5. 如果話新移民對香港無貢獻所以唔應該有錢派, 咁滿左十八歲果班青少年呢? 讀緊書、啱啱讀完書、仲未搵到工、仲要父母養、搵到工但人工又唔係高到要交稅既人大把, 佢地又有咩貢獻? 掉返轉頭諗, 愈係無能力貢獻果班人先最需要派錢!
6. 「香港人」呃政府福利既人都唔少, 大學生攞政府Grant Loan去炒股票你聽過未? 如果俾我揀, 我寧願俾錢新移民, 佢地就係因為比人歧視而搵唔到工, 飯都無得開, 點同你講仁義道德?
7. 點解佢地要嚟香港捱苦? 咪就係因為佢地認為大陸唔好, 「嚮往」香港哩個「自由」城市, 又以為有福利有政府照顧, 下一代可以過更加好既日子!!你父母你祖父母或者太祖父母都可能係咁諗。本來應該慶幸香港成為人人都想嚟既「樂土」, 又唔見佢地想移民去埃塞俄比亞, 係咪先?不過其實我都認同, 佢地真係對香港有太美麗既誤會, 起碼最錯係對香港人既公民意識有錯誤期待, 以為有「爭取」的自由, 結果遭人白眼。咁佢地有需要咪去爭取囉, 李澤鉅就唔敢行出嚟話佢想要啦, 未攞到錢就急急腳聲明會捐出去喎!
8. 好多新移民都好勤力, 建築地盤工人賺既真係血汗錢, 仲有做餐廳洗碗打雜都係佢地, 無計啦, 低學歷又俾人歧視, 未有人爭取最低工資果時, 係新移民先咁蠢咬緊牙關做落去。講真, 香港實施九年免費教育咁耐, 洗碗哩類唔駛學歷要求既辛苦工都有人做, 唔奇怪既咩?而家為左六千蚊對佢地喊打喊殺, 為咩先? 問心, 人地攞左六千蚊嚟養家活兒, 你攞左又會點駛呀?
9. 好多香港人都鍾意抽水攞著數, 新移民做既都係同一套, 不過可能更加出色, 香港人爭輸左唔抵得?
10. 其實輸入優才計劃既「優秀人才」係咪都算新移民? 佢地對香港算唔算有貢獻? 如果佢地有貢獻但又唔夠七年無份派錢, 好似唔係好公平喎!!但係無貢獻又點解要「輸入」呢?
11. 最衰係果六千蚊!! 我而家鄭重宣布, 如果真係收到錢, 我會全數撥捐我兩老, 佢地都曾經係「新移民」,做盡啲辛苦工湊大我地, 無攞過綜緩, 無住過公屋, 我連讀大學都老老實實填家庭收入連半份Grant都無收過喎(唔知點解啲買名牌袋同衫褲既同學又Grant到喎, 可能真係家家有本難唸的經啦!)到而家佢地仲未有得享清福!! 所以我唔會懶清高話唔要啲錢, 最多係我唔去用佢啫。
12. 新移民令香港人不滿係因為資源爭奪, 不過除去新移民只係治標不治本, 問題源頭不是那些大財團、地產商嗎? 還有最大既始作俑者是政府!
[原文刊於Facebook notes]
0 意見:
Post a Comment